六四晚會之後，蘋果日報刊登左一篇《悼念六四，放下無謂包袱》。唔係叫你唔好再悼念六四，只係叫你放低無謂既大民主中國包伏啫。之前寫過的社民連青年嚴敏華就立即上頭，撲出黎大罵「中共不倒，解放軍一到就車死你班香港自治撚！」。再一次證明左我之前所講，「愛國民主派」每年大搞六四，只係為左自己既大中國理想。其次，篇文只係叫你放低包袱者，叫你將中國同香港鬆綁啫，咩「城邦自治」，講都冇講過，咁又俾你鬧係「自治撚」。
都話呢個年頭，大家根本唔使講粗口。因為佢地一唔鐘意你既意見，先話你係「民粹」，後再鬧你係「自治撚」。自己搞遊行，就點都唔係民粹。你堅持大中國主義，就一定唔係「中華法西斯撚」。退一萬步講，就算香港人要實現真正自治，民族自決，呢個係所有實行民主政體既地區，都被視為天經地義，有咩咁大逆不道？
照呀嚴小姐咁講，中國十三億人無終極同真正的民主自由，我地就唔撚使旨意爭取自己的民主自由，放個屁都要心繫家國。食餐飯都要講句「建設民主中國」？唔差在加埋「教主文成武德，仁義英明，中興聖教，澤被蒼生，千秋萬載，一統江湖」？差在你地個「教主」睇唔見，係你地口中叫做「民主」嗟嘛﹗
邊個最驚解放軍？中共有幾多人、幾多錢、幾多國企水路、幾多二奶係香港？就算佢真係黎，咁又點？人生在世，難逃一死。唔通因為驚死，就賣中共怕？年年歌頌死者，原來自己最驚死。人地死就係偉大，係為左你既民主統一大中國。人地一話要搞好香港民主先，你唔同意，唔係講你果套道理，而係搵解放軍恐嚇香港人。我巧驚驚啊！原來追討基本法賦予香港既高度自治（唔講獨立，已經好無「志氣」，好理性和平非暴力），比起解放軍殺人仲要大逆不道！
原來「高度自治」就係「分裂祖國」。照呢個邏輯，咁基本法本身就係分裂緊祖國喎！原來你地仲中共過講一國兩制既鄧小平﹗當年既中共可以容忍一國兩制，依家既愛國民主派就連「自治」都要打為洪水猛獸﹗一講到「中國」，佢地既思維語氣，就同葉國一模一樣。「你XXXX，大陸咪出兵囉﹗」係咪去完六四晚會，情緒太過hyper，大中國高潮上腦，所以胡言亂語？食左藥未呀？我有精神科醫生可以介紹俾你架﹗
咁驚死，搞咩抗爭？中共係香港出坦克車，咁係大陸又唔會咩？自已日日夜夜係香港度「支持建設民主中國」。自己唔鐘意本土，Fine﹗咁人地本土得唔得？做咩要兇人？咁驚死，投共咪得囉，使咩煩？咁驚死，咩都唔使做架啦！爭取雙普選？解放軍會殺撚哂你地架！反對梁振英？解放軍會殺撚哂你地架！反對中聯辦種票、操縱選舉？唔好呀！由得佢地啦！你出句聲，解放軍會殺撚哂你地架！
邏輯如此混亂、修養如此可笑既社運青年，仲慘過政治冷感既人。政治冷感最多唔理，唔會有d咩「香港人一定要犧牲為中國爭取民主然後自已先可以有民主」。香港同中國都係冇民主自由既麵包。大家都係餓到無哂力。點解香港人唔可以自已搵方法食飽少少先？唔通兩邊互相拖累，累鬥累，一事無成，攬住一齊死，咁先叫熱愛斯民斯土？
嚴敏華，你係咪覺得香港自由過中國少少，就住得好有罪惡感？係咪要好似大陸好多憤青咁，怨毒不已咁話：「你们香港人有什么宝，要给你自由的呀？咱们没有自由，日子还不什么这样的过﹗？」係咪又要講返黃子華既魚蛋論呀？中國人唔夠汁，我地就瀨哂我地自己既俾對方，搞到自己一窮二白，一滴都冇，咁先夠血濃於水？咁既愛國左派，無權無勢，最多獻世。有少少權就大事不妙，只會一腔熱血地賣港，以成全佢地心目中既「民主中國」，仲以為自己做緊「民主聖人」。遺臭萬年的時候，仲以為自己會名流青史。
「除非你把愛國主義從人類中驅逐出去，否則你將永遠不會擁有一個寧靜的世界。愛國主義是一種有害的、精神錯亂的白痴形式。愛國主義就是讓你確信這個國家比所有其他的國家都要出色，只因為你生在這裡。」——喬治．蕭伯納 （George Bernard Shaw）
Search